Taremi: O‘zbekistonga qarshi o‘yin hech qachon oson emas

Eron milliy terma jamoasining yetakchi hujumchisi Mehdi Taremi Kabo-Verde ustidan qiyin g‘alaba qozonilgach, finalda qaysi raqibni ko‘rishni istashi va O‘zbekiston terma jamoasi haqidagi shaxsiy fikrlarini o‘rtoqlashdi. Uning so‘zlariga ko‘ra, jamoalar tanlovi futbolchilar ixtiyorida bo‘lmasa-da, qaysi raqib bo‘lishidan qat’i nazar, ular finalga jiddiy tayyorgarlik bilan kirib boradi.

Taremi fikriga ko‘ra, Eron jamoasi uchun Misrga qarshi o‘ynash yangi tajriba, yangi emotsiya va yangi taktik sinov bo‘ladi. Shu bois, u bu imkoniyatni alohida qiynalmasdan qabul qilishlarini tan oldi. Biroq, O‘zbekiston terma jamoasi haqida so‘z ketganda, u o‘z munosabatini butunlay boshqacha ohangda bildirdi.

“O‘zbekiston bilan necha marta o‘ynagan bo‘lsak ham, ular hali ham o‘ta jiddiy raqib. Oxirgi yillarda ular tez sur’atda o‘sdi, o‘z o‘yinini topdi va juda muvozanatli jamoaga aylandi. Ba’zan ularga qarshi o‘ynash biroz zerikarlidek tuyulishi mumkin, ammo bu faqat tanishlik sabab. Aslida esa, ular bilan maydonga tushish hech qachon yengil emas”, — deydi Taremi.

Eron hujumchisining fikricha, o‘zbekistonlik futbolchilarning sifati va jamoaviy uyg‘unligi yuqori darajada. Ular maydonda tezkor, intizomli va taktik jihatdan ancha yetuk futbol ko‘rsatadi. Shu bois, agar finalda aynan O‘zbekistonga qarshi to‘qnash kelishga to‘g‘ri kelsa, Eron barcha kuchini ishga solib, g‘alaba uchun oxirigacha kurashadi.

“Qaysi raqib bo‘lmasin, biz maqsaddan chekinmaymiz,” — deya qo‘shimcha qildi u. — “O‘yin orqali jamoamizning xarakteri, irodasi va tayyorgarligi yanada oshishiga ishonaman”.

Eslatib o‘tamiz, kecha Eron Al Ain Cup yarim finalida Kabo-Verdening qarshiligini penaltilar seriyasida yengib o‘tib, musobaqaning hal qiluvchi bosqichiga yo‘l oldi. Finalda ular Misr yoki O‘zbekistondan biriga qarshi bahs olib boradi.