“IT-Park” loyihasining ikkinchi bosqichiga start berildi
“IT-Park”ning ikkinchi bosqichi qurilishiga tamal toshi qo‘yildi. Tadbirda O‘zbekiston Prezidenti Shavkat Mirziyoyev ishtirok etdi.
Ikki yil avval 200 million dollarlik investitsiya hisobiga loyihaning birinchi bosqichi amalga oshirilgan edi. Qariyb 4 gektar maydonda 20–25 qavatli 6 ta ofis binosi va zamonaviy kongress-xoll barpo etilgan.
Yangi bosqich doirasida “IT-Park” hududi 1,5 baravar kengaytiriladi. Bu yerda Saudiya Arabistonining “Data Volt” kompaniyasi bilan hamkorlikda quvvati 12 megavatt bo‘lgan, 150 million dollarlik data-markaz qurilishi rejalashtirilgan.
Keyingi bosqichlarda yana 3 milliard dollar investitsiya kiritilib, markaz quvvati 500 megavattgacha oshiriladi.
Shuningdek, hududda jami 6 ta yangi bino — Sun’iy intellekt markazi, Kosmos va kelajak texnologiyalari markazlari, 2 ta 20 qavatli ofis binosi hamda servis va savdo markazlari barpo etiladi.
Bir so‘z bilan aytganda, bu majmua eng ilg‘or texnologiyalar, innovatsiyalar va bilimlarga asoslangan “Sun’iy intellekt xabi”ga aylanishi kutilmoqda.
