MAN yuk mashinasi Parkentda 4 ta mahallani gazsiz qoldirdi

Toshkent viloyatining Parkent tumanida yuk avtomobili yuqori bosimli gaz quvurini urib yubordi, deb xabar berdi Energetika vazirligi.

Ma’lumotlarga ko‘ra, hodisa natijasida gaz sizib chiqish holati yuz bergan va xavfsizlikni ta’minlash maqsadida “Yoshlik”, “Markaziy”, “Guliston” hamda “Oq tepa” mahallalaridagi 2400 dan ortiq xonadon hamda 50 ga yaqin ishlab chiqarish obyektida tabiiy gaz ta’minoti vaqtincha to‘xtatilgan.

Hozirda tuman gaz ta’minoti bo‘limi avariya xizmatlari ta’mirlash ishlarini olib bormoqda. Mutaxassislar ma’lum qilishicha, nosozlik bartaraf etilgandan so‘ng gaz ta’minoti to‘liq tiklanadi.

Mutasaddilar aholidan vaqtinchalik noqulaylik uchun uzr so‘rab, xavfsizlik choralariga amal qilishni so‘ramoqda.