John Deere O‘zbekistonga $300 mln texnika yetkazadi

Amerikaning John Deere kompaniyasi O‘zbekiston hukumati bilan $300 millionlik qishloq xo‘jaligi texnikasini yetkazib berish bo‘yicha kelishuv imzoladi. Ushbu shartnoma O‘zbekiston Prezidenti Shavkat Mirziyoyev va AQSh savdo vaziri Govard Latnik ishtirokida o‘tkazilgan ikki tomonlama kelishuvlar doirasida imzolangan.

Mablag‘ning yarmi, ya’ni $150 million, AQShning Ayova shtatidagi John Deere zavodida ishlab chiqarilgan paxta terish mashinalarini sotib olishga yo‘naltiriladi. Shuningdek, O‘zbekiston va Boeing korporatsiyasi o‘rtasida Uzbekistan Airways aviakompaniyasi uchun sakkizta yangi 787 Dreamliner samolyotini yetkazib berish bo‘yicha shartnoma imzolandi.

Shu tariqa, O‘zbekistonning umumiy buyurtmalar portfeli 22 samolyotga yetdi. Mazkur kelishuvlar AQSh va Markaziy Osiyo mamlakatlari o‘rtasidagi yirik ishbilarmonlik uchrashuvi doirasida amalga oshirildi.

Unda umumiy qiymati $25 milliarddan oshiq kelishuvlar e’lon qilindi, jumladan, O‘zbekiston bilan bog‘liq loyihalar ham mavjud.
John Deere