AQSH semizlikka chalingan odamlarga viza cheklovi joriy qilishi mumkin

AQSHda migratsiya siyosati yanada qat’iylashishi mumkinligi haqida yangi ma’lumotlar paydo bo‘ldi. Washington Post xabar berishicha, Tramp ma’muriyati qandli diabet, saraton va semizlik kabi kasalliklarni viza berishni rad etish uchun asos sifatida qo‘llash bo‘yicha rasmiy ko‘rsatma tayyorlagan.

Manbaga ko‘ra, Davlat departamenti nafaqaxo‘rlar, qarib qolgan ota-onalar yoki nogiron qarindoshlarni boqadigan shaxslar uchun ham vizalarni cheklash g‘oyasini ma’qullamoqda.

Rasmiylar bu qarorni shunday shaxslar uchun tibbiy xizmat va parvarish xarajatlari yuqoriligi bilan izohlamoqda. Ular ta’kidlashicha, AQSHga kelgan bunday migrantlar davlat byudjetiga qo‘shimcha og‘irlik yuklaydi.

Biroq jurnalistlar va tahlilchilar bu harakatni boshqa jihatdan ko‘rmoqda. Ularning fikricha, ushbu yondashuv — migrantlarning kirishini yanada qisqartirishga qaratilgan navbatdagi qadam bo‘lib, Tramp ma’muriyatining umumiy migratsiya siyosatini yanada qattiqlashtirishini anglatadi.

Ayni vaqtda qaror rasman kuchga kirmagan bo‘lsa-da, muhokamalar AQSHda migrantlar uchun yangi cheklovlar paydo bo‘lishi mumkinligidan darak bermoqda.